De Aegyptiorum tumultu

Mahometus El Baradei, anno MMV praemio Nobeliano exornatus, Cairi cum reclamantibus postulat eiurationem Hosnis Mubarak Aegypti praesidentis; multitudinem in foro Liberationis (in imagine ostento) allocutus ad patientiam hortatus est, proximam commutationem praenuntians. Qui iam diu putabatur praesidentis sellam appetere. Sunt oppositorum factiones, quae Mahometum rei publicae ducendae admodum idoneum censeant. Interea Hosnis Mubarak cum exercitus ducibus ante diurnarios convenit, animi tranquillitatem ostendens.

Crebris tumultibus centum saltem homines interierunt, milia vulneribus affecti sunt non solum Cairi sed etiam Alexandriae et Suesiae. Gregatim captivi e carcere effugerunt, cives res suas vi a praedatoribus defendere narrantur, damnis et direptionibus affectum est praeclarum Musaeum Aegyptium ubi monumenta et ornamenta antiquissima servantur.

Scripsit Herimannus Novocomensis