Lieberman sodalitates pacificatorias aggreditur

Avigdore Lieberman navante concilium Israelianum in sodalitates pacificatorias inquirere vult, ut reditus pecuniarum, quas acceperint, patefacere cogantur. Quae hoc consilium initium aetatis Neo-McCarthianae appellant; nullo alio consilio id fieri, nisi ut omnibus, qui aliter sentiant, libertas dicendi adimatur. Faina Kirschenbaum, legata partium Israel Beitenu, quae hanc inquisitionem postulaverat, ipsa huic iudicio praeesse vult. Praecipue in eas sodalitates esse inquirendum, quae "auctoritatem militum Israeliam defendentium detrectent".

Partes dextrae indignabantur, quod nonnullae earum sodalitatum cum legatis Nationum Unitarum se coniunxerint, qui de bello Gaziano inquisivissent. In litteris a iudice Richardo Goldstone  relatis Israeles scelerum bellicorum atque inhumanitatis insimulati sunt.

Iam anno superiore in concilio Israeliano Knesseth fuerunt, qui voces illorum, quippe qui nidum proprium inquinassent, opprimere conati sint.

Alteram inquisitionem postulavit Danny Danon, legatus partium Likud: Quaerendum esse, quatenus regimina extera eas actiones, quae contra rem publicam Israelianam factae essent, pecunia sua  adiuvissent; praeterea quaerendum esse de fundis nomine falso acquirendis.

Quod praecipue ad emptores Arabicos pertinet, qui nomine gregum dextrorum (e.g. Be Emuna aut Israel Land Fund) fundos emere solent. Qui greges id contendunt, ut Hierosolyma orientalis a nullo nisi ab Iudaeis colatur. 

Sodalitas Betselem, quae iuribus humanis tuendis studet, "nil celabimus", inquit, "neque enim a sodalitatibus iura humana defendentibus fama Israeliae maculatur, sed talibus consiliis, qualia  a Knesseth nuper capta  sunt". Legati ne eos detrectent, qui regimen reprehendant, sed id agant, ut de informationibus a se allatis disputatio fiat.

Scripsit Volfgangus Austriacus