RESPONSUM CAUPONIS AD CRISIN

Solvite, quot vultis

Caupo quidam Londinensis, qui in septentrionali tribu Farringdon tenet cauponam nomine "Puerulus" ("Little Boy"), invenit novam viam crisin oeconomicam pugnandi: in hac enim caupona licet pro cibis comessis solvere quot volunt convivae. Licet etiam omnino non solvere, si ita volunt - explanat novam rationem caupo Peter Ilic. - Si volunt, dent centum libras (100 L), si tamen aliter sentiunt, gaudebo etiam data mihi sola libella (1 p). Convivis ipsis est eligendum, ego tantum oro, ut solvant secundum suam aestimationem bonitatis cibi ac ministerii. Tantum pro potionibus pretia fixa porro sunt solvenda, gratiis tamen praebetur aqua.

Talis ratio solvendi valebit apud "Puerulum" usque finem mensis Februarii, postea computabit dominus Ilic - qui munere in hac caupona fungitur iam a 26 annis - accepta expensaque ac, si pecuniae satis remanebit, libertatem ad libitum solvendi prolongabit in Martis mensem. Ipse dicit se primum de nova ratione solvendi cogitare coepisse cum praeterito anno vidisset operarios argentariarum tribus Forum (City) quaerere cauponas cum ientaculis quam minimo pretio. Tunc gustationes (ut pastata iecorum anserinorum) in caupona "Little Boy" stabant tribus aut quaternis libris, dum cibi principales venum praebebantur denis fere libris.

Scripsit