Annus
2 0 0 9


Debitum post quadraginta annos solutum

Debitum post quadraginta annos solutum

Mense Aprili anni 1969 Anglus Jim Webb, itinere per Europam continentalem una cum amico peracto, autoraeda vehens urbem suam Sheffield repetiturus ad portum Belgicum Ostendam advenit. Ibi vir quidam iuvenis ad eum amicumque appropinquavit poscens, accentu Australiano Anglice loquens, quinque libras, ut tesseram itineris navi traiectioria per Fretum Gallicum sibi emere possit, nam omnino sine pecunia se relictum dixit.

Freto Gallico a tribus navi una superato, Australianus ille inscriptionem cursualem Webb sibi innotuit promisitque se debitum redditurum, quantocius potuerit. Postea evanuit numquam de seipso denuo nuntians. Usque ad praeteritum mensem, cum Jim Webb, nunc aetate 72 annorum, domum vespertino tempore revertens, a vicino donatus sit involucro chartaceo a viro quodam Australiano relicto. Intus invenit 200 libras (tantis enim nunc aequassent illae quinque librae, si ab anno 1969 in argentaria manerent) necnon scriptum breve dicens: Iacobello Webb, bono viro. A Garrio Fenton, debitore lentissimo.

Dominus Jim Webb valde nunc dolet se non adfuisse domi, cum Garry Fenton eum visere conatus est. At hic inscriptionem sui electronicam in epistula reliquit, ergo sperat Webb ambos denuo se conventuros. Ducentas libras tamen ad res charitativas societati cuidam statim dedit.

Scripsit



Retro ad:

Novissima editio
Summum paginae