LVDMILA BOHEMA

Filia magnatis Bohemi Ludmila nata est circa annum octingentesimum sexagesimum (860). More illius temporis adulescentula sponsa data est Borziwoio principi Bohemo. Is, cum esset filius Przemisli I, censetur conditor seriei principum Przemislidorum, qui usque ad ineuntem saeculum X erant subiecti principi Morauiae, ubi florebat opus euangelii Slauice nuntiandi a Graecis fratribus Constantino-Cyrillo et Methodio, et rituum celebrandorum linguâ Slauicâ.

Anno fere octingentesimo septuagesimo quarto Ludmila et Borziwoi ab episcopo Methodio baptizati sunt; quorum exemplum secuti sunt multi Bohemi. Christiani coniuges aedificauerunt fidelibus primam ecclesiam. Marito autem mortuo uiginti annis post receptum baptismum, Ludmila eo tendebat, ut Christianus fieret reliquus Bohemorum populus. Huic tamen rei multi resistebant, inter alios Drahomira, nurus eius siue uxor filii eius Wratislai simulque mater Venceslai, futuri principis et sancti. Cui quidem puero et adulescentulo pia auia tradebat fidem et amorem erga Dominum Iesum et Mariam Virginem. Docebat eum etiam linguas Latinam et Slauicam ecclesiasticam.

Cum Venceslaus esset adulescens quindecim annorum, pater eius Wratislaus et frater Spitigniew perierunt de causis ignotis. Illud erat tempus difficillimum, quo Bohemia uexabatur a Hungaris (Magyaris) conantibus hanc terram occupare. Quoniam Venceslaus erat nimis iuuenis ad defensionis munus obeundum, gubernaculum obtinuit Drahomira ideo, quod Ludmila tametsi potuit illud praetendere, maluit recedere et habitare in castello Tetin, perdens tamen iunctionem cum suo nepote. Hoc sacrificium non fuit satis Drahomirae, quae putans Ludmilam conspirare cum Venceslao ad ipsam destituendam, iussit illam suffocare anno nongentesimo uicesimo primo. Corpus eius postea Venceslaus transtulit in mediam urbem Pragam (Hradczany) et in ecclesia sancti Georgii sepulcro condidit.

Suffociationem Ludmilae monstrat imago chronicae Dalimili:

Scripsit frater Benedictus Huculak OFM