De conventu subaquaneo

Praesidens Mahometus Nasheed et omnes ministri regiminis Insularum Maldivarum sub Oceani Indici superficie in viridi lacuna convenerunt, ut universalis calefactionis minas coram toto mundo patefacerent: regimen scriptum solemne subscripsit, quo deminutio emissionum carbonii dioxydati vehementer postulatur. Praesidens Mahometus admonuit non licere conventum mundanum Hafniae mox habendum ad nihilum recidere; diurnario cuidam roganti, quid si hoc eveniat facturum sit, respondit: "moriemur". Mense Decembri proximo Hafniae convenient totius orbis legati, ut pactiones Kyotone de caeli commutatione moderanda anno MCMXCVII subscriptas renoventur.

Cum Insulae Maldivae CCX tantum centimetra e mari emineant, putant incolae eas demersum iri si oceanus increverit. "Nuntium nostrum mittere cupimus, ut omnibus constet quid accidat quidque patriae nostrae eventurum sit, nisi caeli commutatio consistat. Nisi Insulae Maldivae hodie servari possint, nobis videtur parum spei ceteris terris relinqui."

Scripsit Herimannus Novocomensis