SECRETUM ALTERIUS BELLI MUNDANI NUMQUAM SOLUTUM

De phaenomeno siphonarii Foo

Foo Fighters est nomen sphaerarum in caelo splendentium, quae tempore alterius belli mundani aeroplana US-Americana et Britanica persequi ab ipsarum aeroplanigis multoties videbantur. De similibus phaenomenis reportabant etiam nautae et milites Americani et Iapones in Oceano Pacifico contra se pugnantes atque, licet rarius, gubernatores aeronavium Germani.

Primum tamen Foo Fighter (quod nomen verisimiliter ortus est a persona intrepidi siphonarii e libris nubeculatis US-Americanorum) observatum esse putatur Decembri 1941 anni a classiariis navis vectoriae (tempore belli ad onera vehenda aptatae) Polonicae "Pulaski", quae sinum Suesensem petebat. Abhinc multoties a multis testibus (imprimis aeroplanigis aut aliis militibus aeroplanis vectis) hae sphaerae clare in caelo splendentes observatae esse reportabantur.

Perspicuosissima fortasse observatio facta est multo mane 25 Februarii 1942 anni in caelo super Angelopoli (Los Angeles), cum magna sphaera lucis in horizonte apparuit, quae se movere multis videbatur e directione urbis Sanctae Monicae usque Long Beach. Hoc tempore, mox post incursum Iaponum in Portum Margaritinum (Pearl Harbour) omnes testes credebant id pencontatrum quodam speculatorium Iaponicum esse ac canones antiaeriae sclopetando in directionem siphonarii Foo (licet tunc fortasse nomen id nondum perdivulgatum esset) emiserunt nonnulla milia iaculorum.

Multas huius generis sphaeras conspectas esse tempore pugnae in mari Iavaico a nautis navis loricatae USS Houston. Circiter 150 spaeras simul se appropinquantes conspexerint milites Americani tempore proelii de possessione insulae Guadalcanal. Multoties horum phaenomenorum observatio reportata est anno 1944 ab aeroplanigis bomboplanorum Anglosaxonicorum Germaniam aut terras a Germanis occupatas petentium. Tunc regimen et Londinense et Vasintoniense suspicere coeperunt rem ad Hitleriana "tela miraculosa" (Wunderwaffe) spectare.

Etiam bello altero pancosmico iam diu confecto nonnulli putabant siphonarium Foo re vera fuisse discos volantes, quos Germani fabricare conati sunt, quamvis nulla adsint nobis indicia, quod machinas has (cuius imaginatio a pictore facta infra monstratur) umquam in aera miserint. Nonnulli iisdem discis volantibus (cryptonimo Germano Haunebu) phaenomenon explicare putabant rerum inexplicatarum volantium (UFO), quae statim post finem belli abundare coeperunt.

Scripsit Stanislaus Varsoviensis