Annus
2 0 0 9


Prague -

De nudorum deverticulo

Fredericus Haferkorn, vir Germanus, se dixit hospitium in Abnobaeis montibus haud longe ab Urbe Gaudii (Freudenstadt) empturum esse ut deverticulum se nudantibus seu naturistis dicatum instituat: ubi vestem quamlibet induere non licebit. Tametsi ignoratur quando nudorum deverticulum hospites accipere coepturus sit, regulae iam divulgatae sunt: ne quis in sedibus communibus strepitet neu clamitet, ne quis umquam veste quavis induatur, ne quis ceteris libidine captus molestus sit, ne quis coram hospitibus futuat, ne quis invitorum imagines apparatu photographico furetur. Putat enim caupo nuditatem ad gestus sexuales minime pertinere.

Deverticulum, cui nomen hodie est "Rosetum" (Rosengarten), usque ad hunc diem montium tantum ambulatores hospitio accepit; posthac fiet, ut scripsit dominus, "locus recreationis hominibus nuditatis amantibus, qui cum eiusdem ingenii participibus ludere et commisceri cupiunt." Ibi duo et triginta cubicula, caupona, cellulae ferventes (quas Finni "sauna" appellare soliti sunt) et infuscatoriae (Anglice "tanning salon") hospitibus praebebuntur.

Sunt in Harz montibus duo vici, quorum praefecti nonnullas semitas nudis ambulatoribus dicaturi sunt; constat naturistas per interrete in locis silvestribus se iam diu convocare sine vestibus ambulaturi. Foedus Germanicum Liberi Corporis (DFK) quinquaginta milia socios congregat: quorum magno numero sperat Fredericus se singulare hospitium praebere.

Scripsit Herimannus Novocomensis



Retro ad:

Novissima editio
Summum paginae