COLLISIO DIPLOMATICA BRITANNIAE ET ISRAELIAE

Rea criminum belli?

Ministra olim rerum exterarum Israeliae, Tsipi Livni, quae hodie est ductrix maximi momenti Israelianae factionis oppositae partis Kadima, non potuit Londinium ire, nam a biocolytis ibi prehenderetur. A proximo enim praeterito die Saturni erat illa officialiter in ius vocata a iudicibus pacis pagi Westminister, apud quos nonnulli greges Palaestinorum accusaverunt eam criminum belli, patratorum scilicet tempore incursus exercitus Israeliani in Zonam Gazeticam exeunte anno 2008 ineunteque 2009. Tunc, in pugnis inter milites Israelianos et bellatores gregis tromocratici Hamas, mortui sunt, secundum fontes Palaestinenses, 1.200-1.400 cives Palaestini, in numero quorum etiam multi cives inermes, mulieres puerique. Quorum mortis rea sit Livni, una cum ministerio tunc primario Israeliae Ehud Olmert necnon ministro defensionis Ehud Barak, nam hi tres iussa belli gerendi dedisse putantur.

Iuxta legem Britannicam, rogatu iudicum Westiminsterensium fit, ut, etiam sine assensu prosecutoris generalis, omnes vigiles publici in Anglia et Cambria obligentur dominam Livni apprehendere et in vincula conicere. Contra hanc legem die Mercurii reclamitando se pronuntiavit minister rerum exterarum Britanniae, David Miliband, qui dixit Israeliam "socium strategicum" Britannorum esse at apprehendendo politicos Israelianos Britannia sibi ipsi maximam noxam affligeret. Contra accusationem Livni vehementer protestatum est hodiernum regimen Israeliense.

Sub tali pressione iudices Westminsteriani vocatum in ius dominae Livni revocaverunt, ipsa tamen iam antea iter Londinense cancellaverat. "Haec non est causa iudicialis contra me, neque contra Israeliam. Haec est causa contra democratiam tromocrates expugnare conantem" - commentata est Livni rogatum iudicum Westminsterensium.

Eadem lege Britannica nitens anno 1998 iudex Hispanus Baltazar Garzon successit, ut in vincula ad spatium temporis nonnullorum mensium coniceret dictatorem quondam Chiliae, Augustum Pinochet, qui Londinum iverat, ut morbo quodam ibi mederetur.

Scripsit Stanislaus Varsoviensis iconoclastes.blog.onet.pl