De procella in Honduria

Una et nonaginta victimae numerantur, de sexaginta hominibus nesciunt auctoritates quid evenerit postquam procella vehementissima "Ida" appellata Honduriam vastavit, eluviei et labium immanium causa. Dux summus adiutorum Georgius Melendez dixit numerum victimarum adauctum iri praecipue in regionibus orientalibus: ibi plurimos incolas domos casasque deserere noluisse, neglecto auctoritatum iussu. Ida antea Nicaraguam ventis violentis verberaverat, mille casas domosque afficiens, agros cultos inundans; nunc Ida paeninsulam Yucataniam versus XVII chiliometra hora quaque percurrens iter facit, ubi plurima deverticula sunt. Etiam in Mississippia, Alabama et Florida verentur auctoritates, ut procella gravibus damnis regiones illas afficiat.

Scripsit Herimannus Novocomensis