QUID PORRO CUM ELECTIONIBUS IN AFGANISTANIA?

Abdullah inopinate regreditur

Die Lunae in urbem capitalem Afganorum, Cabuliam, advenit secretarius generalis Nationum Unitarum (UN) Ban Ki-moon, ut de futuro statu huius terrae disputaret cum viris ibi politicis maximi momenti, postquam die Solis de electionibus praesidentis huius terrae inopinate se recepisset candidatus oppositae partis, Abdullah Abdullah (in photographemate), qui erat simul solus aemulus hodierni praesidentis Afganistaniae, Hamid Karzai.

Ambo candidati inter se pugnaturi videbantur die 7 Novembris, cum altera pars electionis esset habenda. Ex prima parte officialiter praesidens Karzai victorem discessit, colligens plus quam 50 centesimarum suffragiorum; haec enim effectus a regimine divulgati statim a partibus oppositis necnon observatoribus internationalibus pronuntiati sunt ut fraudulenti. Pressus a regiminibus terrarum occidentalium, imprimis a Vasintonia, Karzai assensit, ut altera pars electionum haberetur.

Rebus ut hodie sunt stantibus, i.e. candidatura Abdullah subito revocata, incertum manet utrum ultima pars electionis sit pergenda, nam solus Karzai ut candidatus ad munus praesidentis remanet.

Utcumque res se habent, revocationem candidaturae Abdullah - quam revocavit propter "summam civitatis necessitatem" - esse, secundum rerum Medii Orientis peritos, malum portentum democratiae in Afganistania porro struendae.

Scripsit Stanislaus Varsoviensis iconoclastes.blog.onet.pl