GREX VICENARIUS IN USA CONVENIT

Novum regimen mundi?

Grex vicenarius (G20) debet mutari in oeconomicum regimen totius mundi, quod regulariter congregatur - dixit diurnariis actorum "Die Welt" minister primarius Magnae Britanniae Gordon Brown. Ductores gregis vicenarii, sive viginti maximarum oeconomice momenti terrarum mundi, diebus Iovis Venerisque conveniunt in urbe US-Americana Pittsburgh, ut de modis globalem crisin coercendi loquantur.

Rem maximi momenti, de qua consilia quaedam verisimilliter capient participes summitatis Pittsburghianae, esse, utrum iam nunc - oeconomia scilicet mundana deneuo crescente - argentariae centrales maximarum terrarum mundi sua programmata stimulativa claudere debeant an potius exspectare donec nova signa oeconomicae stabilitatis appareant. Porro stimulationes tenere volunt e.g. Britanni ac ipse Gordon Brown modo appellavit, ne hoc "respiratrum adiuvatorium" mundi statim deponatur.

"Nondum est hora, ut nos oculos a rebus oeconomicis avertamus. Numerus hominum sine munere manentium crescit et nos non possumus hos homines nunc relinquere" - dixit Brown. Magis parati ad programmata stimulativa deponenda videntur esse terrae, quorum productus domesticus denuo crescit, ut in Asia Sinae Indiaque et in Europa Francogallia ac Germania. Hae ambae volunt, ut novum panglobale vectigal introducatur ad terras oeconomice nondum maturas summa circiter 50 miliardis dolariorum adiuvandas.

Terrae sociae G20 sunt: Argentina, Australia, Brasilia, Canada, Sinae, Francogallia, Germania, India, Indonesia, Italia, Iaponia, Mexicum, Russia, Arabia Saudica, Corea Meridionalis, Africa Meridionalis, Britannia, USA, Turcia et Unio Europaea.

Scripsit Stanislaus Varsoviensis