ACUITUR PUGNA CONTRA TALEBANOS

Impetus decisivus US-Americanorum

Exercitum US-Americanum impetum decisivum contra rebellatores islamici gregis Taleban in Afghanistana provincia Helmand coepisse nuntiant duces Pentagonienses. Cui impetui adesse circiter quattuor milia militum delectorum marinorum (US Marines) necnon 650 sociorum Afghanorum. Adiuvantur actiones a copia aeronavium variarum terrarum Foederis Atlantici (NATO).

Exercitus USA brigadarius Larry Nicholson dixit diurnariis impetum - cognominatum 'Khanjar' sive 'Gladius' - coepisse die Iovis multo mane in valle fluminis Helmand. Qui impetus antecessus est a simili motu militum Britannorum, qui a proxima praeterita septimana acriter contra Talebanos pugnant.

Provincia Helmand autem putatur esse propugnaculum principale rebellatorum.

- Quo veniemus, ibi iam manebimus, ut tute ibi vivant cives usque tutela eorum tradi possit agminibus Afghanorum - pollicitus est Nicholson.

Scripsit ANL