CONDICIONES MUNDI MULTO GRAVIORES SINT EXSPECTATIS
CONDICIONES OECONOMICAE MUNDI MULTO GRAVIORES SINT
EXSPECTATIS
Incrementum demum anno 2010
Prognosi novissima Argentariae Mundanae
(World Bank) productus domesticus terrarum totius mundi
cadet hoc anno in summa intermedia tribus centesimis (3%) et not
una-virgula-septuaginta quinque centesimae (1,75%) ut adhuc
periti huius argentariae exspectabant. Prognosis divulgata est
ante summitatem ministrorum rerum fiscalium terrarum Gregis
Octonarii (G8), qui die Veneris Lupis (Lecce) Italorum
conveniunt.
"Maxima pars terrarum cum oeconomia evolvente (developing
economies) obiturae sunt hoc anno recessioni et prospectus
earum non vero sunt optimi" - dixit die Iovis praeses
Argentariae Mundanae, Robert Zoellick, in conferentia diurnaria.
At vaticinatio peioris condicionis advenientis allatur modo in
hoc temporis momento, cum multi credebant data macroeconomica
novissima monstrare reditum incrementi, qui reditus imprimis in
Sinis sed etiam usque quemdam modum in Civitatibus Unitis
Americae (USA) quasi mox futurus sit. Secundum Zoellick, hic
annus erit primus post alterum bellum mundanum, quando oeconomia
totius mundi retrogradietur.
Talem eventum iam prius praedixerunt analytici Organisationis
Oeconomicae Cooperationis Progressusque (OECD), qui putant
hornotinam oeconomiam mundanam casuram passu 2,7%. Grex autem
affiliata Argenatariae Mundanae, Internationalis Fundus Nummarius
(IMF), aesimat hunc casum fore gradu 1,3%. Nonnulli peritorum
sperant veram mundi condicionem oeconomicam esse aliquo in loco
inter has tres prognoses, nam horribilium numerorum Argentariae
Mundanae causam esse potest, quod eius periti relative parvam
partem in suis calculationibus dent datis macroeconomicis e Sinis
venientibus, at haec terra sine ullo dubio melius aliis
principalibus mundi civitatibus se habeat.
Zoellick dixit se nihilominus adhuc sperare anno 2010
oeconomiam orbis terrarum denuo creturam, sit etiam tunc
incrementum minus exspectato.
Scripsit ANL
|