INSULIS FIJI CONVENTIBUS REGIONALIBUS ADESSE NON LICEBIT

De comitis liberis contentio

Nationes insulares meridionalis partis Oceani Pacifici decreverunt se non invitaturos ductores legatosve insularum Fiji in proximos sui - id est 16 civitatum insularium - conventus, quia regimini ministri primarii dictatorisque Fijiani, commandarii Franci (Frank) Bainimarama (in photographemate a laeva), non contigit diem comitiorum democratice peragendorum statuere.

Antea Forum Insularum Pacificarum (ut nominatur grex), at imprimis Australia Novaque Zelandia, a Bainimarama flagitaverant, ut usque Kalendas Maias diem electionum designaret. Commandarius tamen respondit democratica comitia non ante annum 2014 habitum iri.

Ut explanavit moderator Fori Pacifici, qui simul est minister primarius Niue, Toke Talagi, praeter prohibitionem summitates conventusve adire, non licebit Fijianis, duce Bainimarama, frui subsidiis pecuniariis huius organisationis.

Commandarius Bainimarama mense Decembri 2006 anni depulsavit democratice electum ministrum primarium Laisenia Qarase, accusans hunc corruptelae atuqe odii erga Indo-Fijianos, immigratores scilicet ex India, qui quorumque filii et nepotes in insulis Fiji vitam agunt.

Mense Aprili ineunte summum tribunal Fijianum sentetiam pronuntiavit Bainimaramam potestatem contra legem tenere, tunc tamen praesidens huius civitatis insularis, Ratu Josefa Iloilo, decrevit iudices errare hosque omnes munere privavit.

Scripsit ANL