REGIMIMEN COMMUNISTICUM DACOROMANIAM ACCUSAT

Tumultus Moldavienses

Contentione diplomatica haerentur vicinae terrae Dacoromania et Moldavia postquam illam regimen huius accusavit incitatione novissimorum tumultuum, quibus afflixa est urbs capitalis Chisinevia.

Die Martis turbae iuvenum studentium adorti erant curiam parlamenti aedesque praesidentis Moldaviae, unde demum postero die a biocolytis expulsi sunt. Hi iuvenes victoriae (ut dicunt) fraudulenti factionis communistarum in novissimis comitiis reclamant. In pugnis vigilum publicorum cum studentibus nonnulla centena hominum vulnerati sunt. Una mulier vitam amisisse nuntiatur propter nimiam copiam gasii lacrimogeni, quam inhausisset.

Agitur de victoria comitiali (iam tertia in serie) rengantium hanc terram communistarum duce praesidente Vladimiro Voronin, qui potiti sunt 49,9 centesimas sellarum in parlamento, dum partibus adversis tantum 13% sellarum occupare contigit. Reclamantes dicunt victoriam fraude adeptam esse, licet prognoses antecomitiales quoque de praestantia communistarum super alias factiones nuntiarent (proportione tamen minori, 36% ad 22%) atque observatores internationales effectus suffragandi probaverint.

Agitur quoque de contentione ethnica diplomaticaque. Regnantes Moldoviam communistae maxima e parte Russophoni sint artioribusque iunctionibus cum Moscovia faveant, maior autem pars suffragatorum factionum oppositarum sint homines Moldavice (sive Dacoromanice) loquentes, qui magis ad Unionem Europaeam vicinamque Dacoromaniam animum advertant.

Adiutores Voronin nuncupaverunt reclamatores ‘fascistas’ accusantque regimen Dacoromaniae tumultus machinari. Secundum agmina portaria Dacoromaniae, Moldavia die Mercurii finem sui cum Dacoromania clausit.

Hodierna Moldavia - praeter Transnistriam sive regionem Tyraspolitanam, quae et hodie se Russiae adiungere studet - fuerat pars Dacoromaniae usque invasionem Sovieticam anni 1940.

Scripsit ANL