LICETNE VINUM IN PYXIDE VENDERE?

Vinicultores reclamitant contra Paris Hilton

Fabricatores vini spumantis generis prosecco, quod in regione circa urbem Treviso in Italia septemptrionali colitur, reclamitant contra usum huius vini nominis ad aliud quasi vinum, quod in pyxide aluminea in vicinis terris Germania, Helvetia et Austria venum praebetur.

Maxime indignati sunt vinicultores photographematis monstrantibus praeclaram heredem catenae deversoriorum luxuriosorum, Paris Hilton, quae nudata, tinctura tantum aurea oblita, adhortatur cives, ut pyxidem "Rich Prosecco" emant. Profanationem Trevisiani, qui annuatim 50 miliones lagoenarum veri prosecco fabricant, putant iam hoc ipsum, quod vinum in pyxide metallica praebetur. Irascuntur quoque admixtione vino odoris pomorum.

"Num est prosecco sucus pomorum?" - rogat moderator associationis agricolarum Trevisiensium, Fulvio Brunetta. Qui nuntiavit in ius fabricatores "Rich Prosecco" mox vocatum iri.

Scripsit Stanislaus Tekieli