Mortes ridiculosae

Mulier quaedam mortua est ob nimiam copiam aquae, quam ebibit, ut hoc modo aliquid pretiosum sibi a pantopolio vinceret... ...milionarius novus, qui in programmate televisifico "Raeda fortunae" villam luxuriosam sibi comparaverat, necatus est ab illius villae portam, nam nesciebat quomodo illa esset electronice moderanda... ...octogenarius quis in pantopolio subito consilium cepit se vectum iri curru ad obsonata movenda, sed post iter nonnullorum metrorum in columnam irrumpens animam efflavit... ...sculptor Germanus obtritus uno sui sculptorum (nomine "Mulier quattuor mammarum"), quod ad ipsum decidit... ...homicida a biocolytis quaesitus, qui casu, in sella pertusa latrinae sedens, se ictu electrico occidit, cum conatus sit televisorium resarcire... ...athleta quidam umbella descendendi peritus, qui volatum sui tantopere cinematographare voluit, ut de camera semper cogitans sine umbella aeroplanum reliquit... ...par iuvenum in Persia, qui autocurru tecto carente vecti, numquam suspicarent in capita eorum subito nagam (est aspis venenosissima Asiae) esse cadendam, quam aquila praetervolans demitterat, fortasse visu autocurrus mirata (audiverantne umquam hi iuvenes de sorte Aischyli?)...

Haec omnes mortes (at adsunt libro descriptiones 1001 talium casuum) verae, aut saltem ut tales ab ephemeridibus totius mundi nuntiatae sunt praeteritis in circiter quindecim annis. Quos casus omnes collegit David Southwell, olim diurnarius Britannus, qui de tristioribus mortibus scribere solebat, necibus scilicet, quae effectus erant bellorum Balcanicorum aut aemulationis gregum mafiae. Sed sint re vera qualescumque mortes ridiculae? Nonne omnes sint tristes, quia mortes sunt? Fortasse non in orbe diurnario...

* 1001 modi ridiculose moriendi (1001 Ridiculous Ways To Die); Auctor: David Southwell. Londini, 2008.

Scripsit ANL