De amore et urbe

(Sex and the City)

USA MMVIII

Direxit Michael Patrick King; idem cum Candace Bushnell scripsit; partes maximi momenti egerunt Sarah Jessica Parker (Carola Bradshaw), Kim Cattrall (Samantha Jones), Cynthia Nixon (Miranda Hobbes), Kristin Davis (Carola York), Christopher Noth (Dominus Magnus), Jennifer Hudson (Ludovica); produxerunt Sarah Jessica Parker, Michael Patrick King, John Melfi, Darren Star; pelliculam curaverunt Matthew W. Flannery et Nate Havens, imagines curavit John Thomas IV, edidit Michael Berenbaum; histriones delegit Bernard Telsey, scaenas curavit Ed Check, vestimenta et comarum ornatus necnon fucos delineaverunt Patricia Field et Moly Rogers, sonitum curavit William Sarokin, musicam delegit Aaron Zigman; pelliculam varias in orbis regiones distribuerunt New Line Cinema, Paradiso Entertainment, Warner Bros. Pictures Distrubution, Distribution Company.

Demum fanatici sexennis seriei brevium fabularum per televisionem divulgatarum "De amore et urbe" facultate donantur, iterum heroidas dilectissimas admirandi: redierunt puellae! quamvis arduum esset "puellas" quattuor praeclaras mulieres amplius quadraginta annos natas appellare. In fabula cinematographica "De amore et urbe" (quae urbs, hoc in promptu est, Novum Eboracum appellatur) personae et loci diuturnae ac praeclarae seriei ita resumuntur, ut ex tenuibus historiolis narratio diligenter exstructa spectatoribus ostendatur. Quam narrationem hic exponere non decet, ne deprehensio curiosis auferatur: hoc tantum referri potest, Carolam Bradshaw Domino Magno nubere conari et novam amicam domi accipere, nigricolorem adolescentem Ludovicam.

"De amore et urbe" suavis et perspicax fabula est, ubi varii animi motus intexuntur: amor amicitia libido derelictio sed maxime et efficacissime venia. Suo quisque errore opprimitur, aut erga semetipsam aut semetipsum, aut erga illam quam (illum quem) diligit perpetrato, suum cuique vulnus dolenter tolerandum est: quam humanam condicionem nisi perpeti neu amovere potueris, omne vitae gaudium neglecta qualubet voluptate auferetur. Cum autem intellexeris onus istud vitam tuam immerito dominari coepisse - nam hoc tibi unum impedimentum est, quod te a laetitia ab animi tranquillitate ab amore ipso arceat -, tum vis tibi erit ignoscendi aut veniam petendi aut (saepius) ignoscendi et veniam petendi.

Ceterum quattuor mirae "puellae" leviter atque argute recitare pergunt itemque cogniti viri: aetate provectus Dominus Magnus, lacertosus Gerardus "Smith" appellatus, timidus Stephanus et Judaeus Henricus necnon duo viri virorum amantes Antonius et Stanford. Super omnes et omnia eminet Novum Eboracum, hominibus toto ex orbe oriundis animata, urbs plena amicitiae et solitudinis, fulgoris et luxus, pretiosarum vestium et aedium magnificarum.

Scripsit Herimannus Novocomensis