CURRUS POPULI REDIVIVUS

Nanus Indorum iam currit

Tandem publice monstratus est automobile vilissimum mundi - Nanus (Nano) Indicae negotiationis Tata Motors, qui constat solis 2.500 dolariis Americanis sive 1.700 euronibus. Neque imago certa curri, nec nomen eius noti erant ante praesentationem diei Iovis in urbe New Delhi habitam et adhuc nominabatur a diurnariis automobile secretum "currus populi", quasi in honorem aliorum nanorum praeteriti temporis, i.e. Scarabei negotiationis Volkswagen necnon Americanae fabricationis Ford T.

Fabricatores Indi sperant Nanum praesertim ab incolis terrarum pauperiorum emptum iri, ab hominibus scilicet, qui adhuc autobirotis in viis megalopolium utuntur. Certe non est ille currus luxuriosus, nec ad movendum maxima cum celeritate aptatus, nam si ultra 75 chiliometra horalia eum gubernares, non bonum id effectum haberet ad motrum cylindricum, quod maxime vim 35 equorum mechanicorum efficere potest. Deest currui radiophonum, desunt pulvini aerii, deest etiam tachometrum rotationem motri monstrans. Non instructus est Nanus speculo a latere vectoris et habet tantum unum, loco duorum, brachium fenestrae deterendae.

Nihilominus est hic sine dubio currus, qui minimo pretio per totum orbem terrarum praebetur, nam vilissimum adhuc automobile mundi notae QQ3 fabricatoris Sinicae Chery Automobiles bis tantum constat, dum nota Maruti Iaponicae negotiationis Suzuki circiter 5.200 dolariis venum it. In USA vilissimum automobile est Chevrolet Aveo, quod plus quam 10.000 dolariorum emptoribus praebetur.

Praeses fabricatoris Nani, Ratan Tata, putat sui "puerum" mutaturum omnem mercatum automobilium mundi, nam magni fabricatores, ut Francogallica Renault et Iaponica Nissan Motor iam nunc cogitant, quomodo Indos aemulari possint.

Scripsit ANL