Annus
2 0 0 8


COMIC RELIEF

http://www.mz-web.de/servlet/ContentServer?pagename=ksta/page&atype=ksArtikel&aid=1221139227753

Ars

Quando Domina Merkel apprehendit Stoiberi pęnem....

Turbae propter monumentum factae: Sculptor defendit opus ectypon Angelâ Merkel nudâ instructum contra opprobrium „pornographiae"

"LUSORES GLOBALES" Gerhardus Schröder (alter a sinistris), Angela Merkel, Edmundus Stoiber necnon Guido Westerwelle spectantur in opere ectypo ab artifice Petro Lenk confecto, quod decem metra longum, quattuor metra latum affixum est curiae oppidi Bodman-Ludwigshafen et formâ est triptychi.

Bodman-Ludwigshafen ex oppido. Petrus Lenk sculptor opus suum ectypon in quodam oppidulo prope Lacum Brigantinum sito constitutum defendit contra opprobrium pornographiae. Petrus Lenk a ddp agenturâ nuntiorum interrogatus dixit hanc sculpturam ad curiam Bodman-Ludwigshafenianam ante paucos dies revelatam de industriâ confectam esse ad rationem politicam vituperandam. Se voluisse accuratę monstrare potentium rei publicae omnium avarissimos. Quorum scandala plerumque, postquam per unum aut duos dies publicę nuntiata essent, in oblivionem cadere – at tale monumentum diutius remanęre ideoque molestiam afferre maiorem.

Petrus Lenk artifex in ripâ Lacűs Brigantini sedet ante duas anates.

Opus ectypon Petri Lenk sculptoris inscribitur "Heredium Ludovici" (qui titulus refert ad Ducem Ludovicum). Eâdem imagine cum alii tum Germani politici praecipui et dispensatores supremi monstrantur partim devestiti et lascivientes, inter quos sunt Angela Merkel (Democrates Christiana), Gerhardus Schröder prior cancellarius foederalis (Democrates Socialis) necnon Guntherus Oettinger Badeniae-Virtembergae praeses ministerialis (Democrates Christianus) eiusque collegae quondam officii et Edmundus Stoiber prior praeceptor Unionis Socialis Christianae (CSU).

Etiam negotiationum Germanicarum dispensatores supremi, quales sunt Utz Claassen, praeceptor quondam ipsius EnBW et Dieter Zetsche, praeceptor Daimlerianus et Ferdinandus Piëch et Leo Kirch, negotiator mediorum necnon Iosephus Ackermann, Germanicae mensae argentariae praeceptor in ectypo opere Lenkiano agnosci possunt.

Petrus Lenk verbis extulit se hôc opere velle demonstrare, quo modo ferę obscaeno inter se conexas esse potestatem et pecuniam. Idem artifex dicit se tractare „feudalismum veterem et novum. Necnon se agere de democratiâ debilitatâ". Itaque se hos statűs societatis sensu translato descripsisse tamquam „politicorum venerem gregalem". Petrus: „Si agitur" inquit, de istorum privilegiis et de ratione, qua pecunia extrahatur e sacculo civium, omnes politici unus alterum adiuvant (originaliter Petrus dicit „dann halten sie sich alle die Stange", locutio Theodisca, quae verbatim valet ‚omnes tenent unus alteri contum’; quam locutionem Theodiscam Petrus sensu lascivo affert - alludit enim ad sensum verbi Theodisci ‚Stange’ ambiguum, quod etiam valet „pęnem erectum"). Res politica multo magis pornographica est quam ars figurativa."

Porro idem sculptor dixit se non debere rationem reddere operis sui. Scilicet reverâ apparere politicos „raro tam felices, secundum sententiam commendabilem, quae esset ‚coalescere et copulari’. Sibi ipsi maioris momenti esse videri oeconomiae praeceptores illustrandos, „nam politici nihil sunt nisi neurospasta illorum dominorum".

Hanc relationem d.11. m.Sept., h.18.33, a.2008 in Germanico periodico interretiali, c.t. est „mz-web.de Mitteldeutsche Zeitung" editam (titulus originalis: „Wenn Frau Merkel nach Stoibers Penis greift") e Theodisco sermone in Latinum convertit Nicolaus Groß praeceptor Sedis interretialis doműsque editoriae, quae appellatur LEO LATINUS: http://www.leolatinus.com/

 

OPUS ECTYPON GRYLLOGRAPHICUM

Num venus gregalis fiat ars publica?

Novâ sculpturâ in plateâ oppiduli Germaniae australis statutâ effectum est, ut philotheori photographent et politici rixentur, quantum valeat ars publica. Eodem opere Angela Merkel monstratur nuda, unâ cum aliis politicis, et artifex hoc non defendit. Qui opus suum vocat „opus ectypon veneris gregalis".

Oppidum Bodman-Ludwigshafen in Germaniae meridie remotâ situm non solet visi a philotheoris Europaeis monumenta cultűs civilis spectaturis. At Germani curiosi e septimanâ eo congregantur ad spectandum novum opus ectypon sculptoris Petri Lenk, quo monstrantur nudi Germani duces politici. Idem opus gryllographicum a nonnullis politicis provincialibus nunc indignanter dicitur esse „vile" et „spurcatum".

PHOTOGRAPHEMATA: VENUS GREGALIS OPERE ECTYPO ILLUSTRATA

Haec tabula triptychi controversialis prope curiam oppiduli Bodman-Ludwigshafen siti ab ipso artifice Petro Lenk donata est.

Parte operis ectypi reliqua, quae appellatur „Heredium Ludovici", monstrantur duces Germani variarum aetatum. At controversia excitata est illâ tabulâ politicorum contemporaneorum.

A sinistris ad dextra: Hans Eichel, minister prior rerum fiscalium, Gerhard Schröder, cancellarius prior, Angela Merkel cancellaria nunc Germaniae, Edmund Stoiber, praeses prior minsterialis, necnon Guido Westerwelle, dux Democratarum Liberalium.

Sculptura controversialis spectat ad triptychon medio in oppido Bodman-Ludwigshafen prope curiam situm. Primo aspectu totum opus ectypon simile est panoramati vivido, cui insunt Germani formâ gryllorum adumbrati. At unâ parte huius operis speciali ostenduntur quinque Germani politici – Angelâ Merkel cancellariâ necnon Gerhardo Schröder priore cancellario inclusis – nudi et ridentes et unus alterius genitalia subigitantes. Supra eorum capita apparet vexillum, cui inscripta sunt verba Anglica: „LUSORES GLOBALES".

Thomas Strobl lapideum opus ectypon dicit "spurcum". Idem est praeceptor Partis Christiano-democraticae rei publicae foederalis Badeniae-Virtembergae et gener Volfgangi Schäuble, ministri rerum internarum. Christophorus Palmer, alter Democrates Christianus Stutgardiensis, secundum ephemeridem Berolinensem „Die Tageszeitung" opus Petri ectypon dixit "vilem effectuum captationem".

Matthias Weckbach burgimagister Bodman-Ludwigshafenianus nulli parti politicae obnoxius vituperatus est, quod sibi mandasset opus „pornographicum" et pro eodem solvisset partim pecuniis publicis. At tabula illa controversialis reverâ est donatio in duos annos ab ipso artifice Petro Lenk facta.

Totum opus appellatum est „Heredium Ludovici", secundum nomen Ducis Ludovici, quod etiam impositum est oppidulo propinquo Ludwigshafen. Eodem opere ostenduntur varii duces historiae Germanicae more gryllographi in ridiculum conversi. Prope politicos ridentes (et viventes) sculptor etiam collocavit gregem nudorum praeceptorum balneantium, inter quos est Ferdinand Piëch, praepositus consilii supervisorii negotiationis Volkswagen, necnon Josef Ackermann, praeceptor Germanicae Mensae Argentariae.

Secundum ephemeridem provincialem, c.t. Mitteldeutsche Zeitung, Petrus Lenk dicit se velle demonstrare "politicam venerem gregalem". Quinque illi politici nudi sunt initiatores illius Legis Quartae ad ministrationes Mercatűs Operarii spectantis („Hartz IV"), cuius causâ in Germaniâ per annos litigabatur et nonnulla scandala gubernantium et argentariorum sunt effecta et patefacta.

Petrus Lenk: "Si agitur" inquit „de istorum privilegiis deque pecuniâ e sacculis civium eximendâ, isti omnes unus alteri tenet contum (sensu ambiguo, v.supra!), ut ita dicam. Res politicae sunt magis pornographicae quam ulla ars."

Idem artifex dixit scandala politica, quibus involuta esset pecunia privata et publica, plerumque in oblivionem cadere publicam post unum aut duos dies, „sed tali monumento, cum remaneret, fore, ut isti homines irritarentur aliquantulo diutius."

Hanc relationem d.09 m.Sept., h.19.00, a.2008/19/2008 in Germanico periodico interretiali, c.t. est „spiegel online" editam (titulus originalis: „COMIC RELIEF – Should Group Sex Be Public Art?") e Theodisco sermone in Latinum convertit Nicolaus Groß praeceptor Sedis interretialis doműsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae