Annus
2 0 0 8


De Clarae Lubich vita

De Clarae Lubich vita

Pridie Idus Martias Clara Lubich duodenonaginta annos nata ob pulmonum morbum domi obiit, haud longe ab Roma.

Silvia Lubich, quae ita exemplo Clarae Asisii pellecta nomen sibi a parentibus datum Silviam commutare voluerat, Tridenti, in oppido Italiae septemtrionalis, anno MCMXX ex patre socialistico et matre Christiana orta, Laureti sacrarium adolescens visitavit ubi Mariae domus ab angelis transvecta esse narratur. Deinde philosophiam Venetiis discere coepit, sed bello secundo mundano furente, Deum tantum omnibus rebus corruentibus superesse intellexit. Quapropter die VII mensis Decembris anni MCMXLIII in Tridenti fratrum Caputinorum parvo templo se omnino ecclesiae dicavit: illo die "Societas Focorum" nata est. Cum anno subsequenti eius oppidum permultis pyrobolis deiectis percuteretur, cum propinquis et parentibus suis inde effugere noluit, miseris auxilium cum paucis sodalibus latura: cibaria et medicamenta copiose animosis puellis affluunt et large distribuuntur (temporibus illis factum est photographema adpositum).

Post bellum Higinum Giordani cognovit, patrem familias necnon scriptorem et senatorem: ita coeperunt Clarae socii et sociae bonorum communionem experiri et quocumque diffundi. Prima sodalitas Virgini dicata "Mariapolis" appellata in Tuscia condita est, cuius exemplum plurimae secutae sunt. Clara cum pontifice Paulo VI primum anno MCMLXIV collocuta est; Johannes Paulus II ipse post annos viginti sedem Arcis Aesulanae (Italice Rocca di Papa) visitavit, in societate a Clara condita amorem supremum agnoscens, signum Sancti Spiritus. Postea Clara Lubich multis episcoporum synodis et conventibus convocata interfuit.

Societas Focorum cum ecclesiis Christianis non catholicis ceterisque Dei fidelibus convenire solita erat, primum cum Lutheranis, deinde cum patriarchis Constantinopolitanis et cum archiepiscopis Anglicanae ecclesiae, cum buddhistis, muslimis, Iudaeis, hinduistis. Anno MCMXCIV facta est una ex praesidentibus Conventus mundani religionum ad pacem exstruendam (Anglice WCRP). Etiam ductores institutorum mundanorum ad verba Clarae Focorumque Societatis modos animum intenderunt, verbi gratia Ordo Nationum Unitarum, Confoederatio Helvetica, Consilium Europaeum.

Post mortem Clarae Lubich milia milium mulierum et virorum toto in orbe operam eius perrecturi sunt.

Scripsit Herimannus Novocomensis



Retro ad:

Novissima editio
Summum paginae