Annus
2 0 0 8


De tumultibus Hellenicis

De tumultibus Hellenicis

Postquam Saturni die adolescens Athenis a custodibus publicis occisus est, graves tumultus in urbe die Solis facti sunt. Minister primarius Costas Karamanlis litteras parentibus adolescentis scripsit, quibus eisdem condolescit. Graeciae rectores polliciti sunt se accurate de iuvenis morte investigaturos esse, quod tamen minime iram discipulorum placavit,qui universitatem occupaverunt magistris plerisque assentientibus. Totam noctem post diem dominicam iuvenes apud Polytechnicon autoraedas incensas et vasa metallica purgamentorum pro vallo contra astynomos obiecerunt et denis tabernis et argentariarum sedibus ignem admoverunt; quattuor et viginti custodes publici vulnerati sunt, quorum unus vitam perclitatur; sex reclamantes comprehensi sunt, quorum unus arma secum ferebat.

Non solum Athenis, sed etiam in aliis Hellenicis regionibus, id est Thessalonicae Patris Cretae Corcyrae, discipuli die Solis catervatim reclamaverunt: Thessalonicae mille iuvenum astynomos aggressi sunt et pyrolagoenis et saxis tabernas coniecerunt. Lunae die etiam factio communistica, Martis socialistica, quae ambae regimini opponuntur, multitudines convocaverunt ut indignationem suam nulla cum perturbatione patefacerent.

Sed Lunae die longe peius res se habuerunt. Nam Athenis ira reclamantium adeo increvit ut incendia, autoraedae conversae, pyrolagoenae coniectae usque ad Acropoleos radices pervenerint, ingens arbor Natalis ornamentis decora igni admoto combustus sit, saxa deverticulorum fenestras perfregerint; custodes publici vapores lacrimigenos per aëra diffuserunt. Thessalonicae astynomus quidam vulneratus est. Minister primarius Costas Karamanlis oratione televisifica omnes ad quietem admonuit, nonnullos iuvenes excitatos accusans. Sed arduum est providere, quando pax in urbibus restitui possit.

Scripsit Herimannus Novocomensis



Retro ad:

Novissima editio
Summum paginae