Annus
2 0 0 8


Copias Russas ex Georgia proficisci

Copias Russas ex Georgia proficisci

Unionis Europaeae observatores cum collegis Georgianis die Solis pro certo compererunt stationem militarem Gori sitam, apud confinium Georgiae et Ossetiae meridionalis, a militibus Russis desertam esse. Hoc dixit nuntius quidam legationis Europaeae: "Quid posthac eventurum sit - ait - ignoramus, sed hucusque hoc est faustum signum." Iuxta pactionem cum praesidente Unionis Europaeae Nicolao Sarkozy subscriptam Russorum exercitui ante diem X mensis Octobris a Georgiae finibus cum Ossetia et Abcazia adeo recedendum est, ut terminus idem qui ante mensem Augustum viguerat restituatur. Etiam in duabus stationibus haud longinquis a finibus Abcaziae recessus militum praeparari videtur: hoc rettulit agentura AFP.

Nihilo minus Russorum rectores copias a se missas in Abcazia et Ossetia australi relicturi sunt, postquam ambarum regionum libertatem invito regimine Georgiae brevi bello perfecto agnoverant.

Scripsit Herimannus Novocomensis



Retro ad:

Novissima editio
Summum paginae