Annus
2 0 0 8


DOLARIUM VILIUS,

DOLARIUM VILIUS, PETROLEUM CITISSIME FIT CARIUS

Denuo cadunt fora bursaria

Fora monetaria mundana vero insaniant: post maximum casum proxima praeterita septimana ineunte maximumque incrementum eadem septimana exeunte (uno tantum die Veneris index paneuropaeus FTSEurofirst 300 crevit 8,2 centesimis, Russicus autem RTS 30 centesimis!), indices bursarum denuo cadunt die Lunae, quod imprimis in foris Wallstreetanis observatur, ubi index maiorum societatum Dow Jones perdidit plus quam duas centesimas partes dum S&P 500 et technologicus Nasdaq Composite amiserunt fere tres centesimas partes. Eodem die dolarium US-Americanum citissime vilius fiebat erga yen, euronem necnon corbem sex principalium nummorum mundi, dum petroleum carius factum est 11%, quod numquam adhuc post memoriam gentium tempore unius diei acciderat.

Causa turbulentiae novissimae timor esse videtur, ne consilia regiminis USA 700 miliardis dolariorum, e fisco publico detrahendis, argentarias aegrotantes adiuvare effectum nullum in longiori tempore habeant. Talia consilia annuntiavit praesidens US-Americanus George W. Bush in fine praeterirae septimanae, quae testis erat decoctionis quartae maximae argentariae collocatoriae Americanae, Lehman Brothers, emptionis "caritativae" aliae bancae collocatoriae titubantis, Merrill Lynch, a Bank of America atque condicionis gravescentis maximae in mundo societatis assecurativae, American Insurance Group (AIG). Quae societas sine auxiliis regiminis nunc valere nequit.

Eodem tempore duae aliae maximi momenti argentariae collocatoriae US-Americanae, Morgan Stanley et Goldman Sachs, fatum Lehman Brothers timentes statum bancarum collocatoriarum ipsae renuntiant et argentariae "regulares" fieri cupiunt, quo peracto licebit iis auxilia fiscalia e statali argentaria Fed petere.

Rebus ita stantibus, una tantum res videtur analyticis bursarum certa: crisis hypothecaria, quae erupit ante annum, nullo modo prope ad sui finem stat.

Scripsit Stanislaus Tekieli



Retro ad:

Novissima editio
Summum paginae