Musharraf se abdicavisse

Praesidens Pakistanorum Perves Musharraf coram populo nuntiavit se officio abdicaturum esse: quem in imagine adposita vides sermonem per instrumentum televisificum die Solis habentem.

Diu de divitiis patriae auctis sub regimine suo disseruit et coniurationem a se ductam anno undebismillesimo laudavit, quam patriae defendendae gratia perpetrasset. "Omnibus rebus accurate consideratis, - inquit - patronis sociisque interrogatis, collegi optimum esse me memet ipsum removere. Populi manibus res futuras committo. Paratus sum vitae meae pro patria profundendae."

Praesidens a factionibus, quae sibi adhuc faverant, legis supremae violatae insimulatus est. Ut primum nuntius divulgatus est, multitudines Pakistanorum in urbium et oppidorum vias descenderunt et fora exsultantes occupaverunt: Navas Sharif, dux Foederis Islamici Pakistaniae, dixit populum Pakistanum ita victoriam consecutum esse; Bilavalus Bhutto Zardari, praesidens Factionis Populi Pakistani, filius Benazirae Bhutto illius anno praeterito saeve cum plurimis occisae, confestim ex Britannia in patriam rediit et diurnariis fatus est: "Ultio matris meae interfectae hoc est: democratia".

Sperant Pakistani caedes et paupertatem mox finem habituras esse.

Scripsit Herimannus Novocomensis