De novo praesidente Paraguaiae

Ferdinandus Lugo, olim episcopus catholicus, factus est praesidens Paraguaianorum, finem denique imponens dominationi Partis Coloratae quae ab anno MCMXLVII sine ulla intermissione summam rerum detinuerat: cui XLI, Blancae Olevar XXXI, Lino Oviedo XXII centesimae suffragiorum a civibus tributae sunt.

Novus praesidens ut "pauperum episcopus" notus est, quippe qui forti animo conflictatus sit ad legem agrariam reficiendam et novas pactiones de energia cum finitima Brasilia agendas; suspensus est a divinis postquam munus suum politicum nuntiaverat. Victori et societates operariorum et indigenae et inopes agricolae faverunt, qui Foederi Commutationis ad hoc constitutum consensum tribuerunt, magna in spe paupertatem et laboris defectum devincendi.

Ferdinandus Lugo post exitum divulgatum ante multitudinem allocutus "Omnes Paraguaiae cives, opinioni cuivis faventes, exhortor - inquit - ut nos adiuvent, ad patriam antiquae dignitati restituendam!"

Scripsit Herimannus Novocomensis