Annus
2 0 0 8


Ingrida Betancourt

Ingrida Betancourt

Praesidens Francogallicus Nicolaus Sarkozy orationem televisificam habuit, qua de salute Ingridae Betancourt se admodum sollicitum ostendit. Ducem ipsum armatorum Manuelem Marulanda sermonem habens adiit, Ingridam gravibus morbis laborare confirmans post sexennem captivitatem: "Tuo tantum consilio opus est - inquit - ut mulier ista e morte servetur: ergo delibera, libera Ingridam Betancourt!". Qui legatos cum Crucis Rubrae expeditione a se mittendos esse praenuntiat, ut captivae libertas restituatur: qua missio illa iter factura est, copiae exercitus Colombiae a praesidente Uribe revocabuntur. Diurnarii retis televisifici BBC tamen negant gregem tromocraticum FARC paratum esse captivae liberandae, quandoquidem dux legationis quae cum regimine Colombiae agere coeperat occisus sit.

Ingrida Betancourt, tam Colombiae quam Galliae civis, candidata Colombiae praesidentatui anno bismillesimo secundo, ab Exercitu Armato Colombiae Commutationis (FARC) erepta in silvis in custodia habita usque ad hunc diem mansit: quam in imagibus adpositis et libera et captiva effingitur. Vir eius illam, iecinore laborantem graviterque extenuatam, aut morituram aut iam mortuam esse suspicatur.

Scripsit Herimannus Novocomensis



Retro ad:

Novissima editio
Summum paginae