Yusuf Raza Gillani, novus Pakistanorum minister primarius

Pervez Musharraf praesidens Pakistanorum Yusuf Raza Gillani ministrum primarium dixit, unum ex ducibus Partis Populi Pakistani factionis sibi adversae quae comitiis nuper habitis vicit; ceteri duces partium quae praesidenti opponuntur inde afuerunt, tacite ita contra Musharraf reclamantes. Quamquam plerique Partis Populi Pakistani asseclae Yusuf Raza Gillani magni faciant, quippe qui Musharraf blanditiis repugnaverit et captivitatem ob falsas accusationes passus sit, illum ut regiminis ducem ante paucos dies delegerunt.

Primum novus minister primarius iudices mense Novembri comprehensos liberavit, qui deliberaturi essent utrum iure Musharraf iterum praesidens factus esset an non: quam ob rem praesidens omnium civium libertatem illo tempore coëgit.

Interea duo legati regiminis USAe colloquia cum Nawaz Sharif habuerunt, Foederis Muslimorum Pakistaniae Nawaz duce: quae factio Parti Populi Pakistani sociata plurimos legatos in senatum misit et cum Gillani nationem rectura est. Hoc verentur Americani, ut persecutio armatorum muslimorum apud fines Afganistaniae deficiat: nam Musharraf se fidelissimum amicum in bello "contra terrorem" assidue se praestiterat. Nawaz Sharif legatis dixit, in Pakistania nullum amplius spectaculum "unius hominis" fore.

Diurnarius Pakistanus Zaffar Abbas scribit in actis diurnis "Prima lux" appellatis legatos Americanos, qui tum pervenerint cum renovaretur regimen, condiciones imponere velle videri.

Scripsit Herimannus Novocomensis