MAXIME SANGUINEUS DIES IN LACINIA GAZETICA AB ANNO 2005

Ultio ictuum contra Sderot

Saltem 46 cives Palaestini et duo milites Israeliani occisi sunt tempore 24 horarum - a vespero scilicet dieVeneris usque ad meridiem Saturni - in pugnis comitantibus incursionem exercitus Israeliae contra Laciniam Gazeticam sub dicione factionis Hamas manentem. Qui erat maxime sanguineus dies ab anno 2005, cum milites Israeliani Gazam reliquerunt. A die Mercurii, cum Israelianorum incursio - praesertim ex aere, sed etiam ab agminibus terrestribus acta - coepit, saltem 66 homines mortui sunt.

Secundum Israelianos, maxima pars mortuorum erant bellatores Hamatici, secundum autem Palaestinos, tantum 16 bellatores necatos esse, una cum septem pueris.

Licet nemo id officialiter agnoverit, incursio Israelianorum putatur esse ultionem recentiorum ictuum missilium mortiferorum e Lacinia Gazetica missorum contra oppidum limitaneum Israelianum Sderot (in photographemate, tempore ictus missilis Hamatici praeteriti diei Mercurii, quo unus iuvenis vitam amisit), quibus ab anno 2005 tredecim cives necati sunt, 450 autem vulnerati. Tria milia incolarum Sderot coacti sunt hanc regionem reliquere. Solo anno currente plus quam nongentia missilia in Sderot ceciderunt.

Ex indagatione opinionum ultimis diebus peracta patet maximam partem Israelianorum etiam nunc velle indutias facere cum motu Hamas, qui a regimine Israeliae tromocratiae reum nuncupatur.

Scripsit Stanislaus Tekieli