De novo igni in Balcania

Iovis die Bellogradi in capite Serbiae turbae iratae, quod aliquot regimina rem publicam Kosoviam liberam agnovissent, Regni Coniuncti Germaniae Croatiae Belgicae et Turciae legatorum sedes adortae sunt; alii reclamitantes aedes USAe legati aggressi inflammatas res per fenestras iniecerunt et ad podium adrepentes vexillum fascisidereum inflammaverunt, per totum aedificium ignem admoventes. Cum demum incendiorum exstinctores flammas vicerunt corpus viri combustum compertum est, quem Americani ad legationem spectare negant.

Unio Europaea Serborum regimen admonet, ut legatorum aedes a tumultibus protegantur. Cum Ordinis Nationum Unitarum consilium securitatis communi consensu impetus condemnavit, tum minister Unionis Europaeae rebus exteris addictus dixit vincula amica cum Serbia in discrimen adductum iri, nisi facinoribus finem Serbi faciant. USAe praesidentis nuntia Dana Perino "Aedes legati nostri - inquit - violenti et nequissimi viri adorti sunt: nos magnopere piget, quod custodes publici perturbationes vitare nequiverint." Querelae etiam per litteras Serborum regimini missae sunt. Quod regimen per ministrum rebus exteris addictum Vuk Jeremic respondit facinora illa nefaria et flagitiosa, a paucis vastatoribus perpetrata, minime nationis totius mentem patefacere, Serbiae ita existimationem vulneratam esse.

Cum in Kosovia et cultus et religionis monumenta veterrima Serborum historiae sint, ipsi ob novam rem publicam nuper creatam condolescunt, legem mundanam violatam esse adfirmantes, quam in sententiam et Sinenses et Russi venerunt. MM hominum auctoritatibus Kosoviae auxilii ferendi gratia ab Unione Europaea mense Martio mittentur, legatus autem Russorum apud NATOnem exercitum suum copias mittere posse non negat, nisi perturbationes desinant.

Scripsit Herimannus Novocomensis