Annus
2 0 0 8


De Chadiae discrimine

De Chadiae discrimine

Rectores Chadiae nocturnum exitum civibus in rei publicae capite N'Djamena et in sex regionibus interdixit, nam minister primarius Nouradine Delwa Kassire Koumakoye ita exercitum putat concordiam ubique reconciliaturum esse. Praesidens Idriss Deby Unionem Europaeam flagitavit ut copias quam citissime mittat quae exules (quos aufugientes in imagine adposita aspicis) in Sudania tutentur, cuius regimen a Chadiae rectoribus rebellibus auxilia tulisse refertur. Nuntius Unionis Europaeae militum tribunus Philippe de Cussac sperat septimana ineunte milites in Chadiam perventuros esse.

Rebelles interea in finibus orientalibus congregati sunt: quorum unus ex ducibus diurnariis dixit Francogallorum helicoptera et aëoronaves desuper pyrobolis armatos percussisse, quod regimen Lutetiae factum esse negavit, dum rebelles admonet ne iterum urbem maximam adoriantur.

Scripsit Herimannus Novocomensis



Retro ad:

Novissima editio
Summum paginae