Annus
2 0 0 8


MAXIMAE CLADES AB ICTU TERRORISTICO 2001 ANNI

MAXIMI CASUS AB ICTU TERRORISTICO 2001 ANNI

Terror Panicus in foris mundanis

Timor negotiatorum oeconomiam Americanam in recessionem casuram esse excitavit die Lunae maximas clades in foris titulorum mundanis. Fons timoris novissimi praecipue videtur esse praeteritae diei Veneris oratio ad nationem praesidentis Georgii W. Bush, qua oratione ductor US-Americanorum cupivit persuadere mercatoribus oeconomiam USA fundamentis fortibus niti. Ut patet, frustra.

Hodiernus casus pretiorum titulorum quasi iam antea exspectabatur, nam ab aliquo iam tempore 'animus bassus' in bursis mundanis regnat, crisi hypothecaria alias sectiones oeconomiae USA paulatim mordente. At huius anni blue Monday sive 'dies Lunae tristissimus' (sc. cum maximo numero suicidiorum) a psychologo doctore Cliff Arnall dies 21 Ianuarii praenuntiatus est, quam praenuntiationem (variam per omnem sequentem annum) permulti negotiatores Americani maxime serio ad negotia sua adhibeant.

Hoc anno tamen doctor Arnall (aur fortasse ipse deus negotiandi Mercurius?) Americanis pepercit: 21 Ianuarii simul est dies commemorandi ducem Nigritarum Americanorum Marthinum Lutherum King, quod die fora Wallstreetiana clausa manent. Clades tamen, aut potius caedes verae, regnaverunt in omnibus fere aliis foris mundi. In Europa index bursae Francofurtensis DAX cecidit 7,2 centesimis, Lutetiensis CAC40 amisit 6,8%.

Immo peius res se habebant in Asia, ubi index Sensex bursae Bombaiensis bis limen casus 10 centesimarum attigit bisque eodem bursa claudi debebat. Forum Singapurense 6 centesimis decidit, Hang Seng index Hongkongiensis delapsus est 5,5%, dum tituli ibi venum praebiti societatum Sinarum continentalium amiserunt in summa media 7,4% pretiorum.

"Hic iam est terror panicus. Aufugere! Quam procul a titulis!" - dixit agenturae Reuterianae Dirk Mueller, cocio domus negotiatoriae ICF.

Mercatores Neoeboracenses tremuli exspectant diem Martis, licet minime sit ille 'tristissimus' secundum doctorem Arnall.

Scripsit StanislausTekieli



Retro ad:

Novissima editio
Summum paginae