Veneris die 9. Januarii hora quarta convocatus erat conventus extraordinarius Circuli Latini Barcinonensis, quo convenirent etiam membra non solum proximi CL Gerundensis, sed et CL Romani, CL Londiniensis et mox futuri CL Caesaraugustani.

Hora tertia Avitus, qui Caesaraugusta advenerat, cum Xaviero Barbastro vecto in Barcinonensi statione 'Sants' congreditur. Cum esset adhuc una hora ante conventum amboque esurirent, una prandere decreverunt. Non potuerant praevidere quam lente res agerentur in electa caupona, et dum mensae apponuntur et auferuntur colloquium multis de rebus agere licet: de annis quibus maximo intellectus acumine gaudeant juvenes, de Circulo Latino Caesaraugustano condendo, de arte polite edendi. Post prandium, Xavierus Avitusque festinanter petunt 'La Table du Pain', ubi conventus erat celebrandus, ad quam post varios ignota in metropoli errores unius fere horae mora perveniunt.

Alii sodales convenerant hora praestituta, et dum mirabantur ubinam essent Xavierus Avitusque, colloquium factum est de recentissime condito Circulo Romano, de tabernis librariis Barcinonis et de vico Sancti Mauri (Sant Mori) ubi patres Vincentii habitant ubique conventus quidam futurus Circuli Barcinonensis vel Gerundensis celebrari possit.

Hora autem fere quinta Avitus Xavierusque sodales alios tandem conveniunt. Xavierus jam plurimos noverat, sed Avito sunt plerique ignoti. Ivanum, CL Barcinonensis moderatorem, et Quirinum, moderatorem CL Romani, sibi notos salutat. Deinde Albinum, moderatorem CL Gerundensis, quem valde avebat cognoscere, Georgium, sodalem CL Gerundensis, Agricolam, sodalem CL Barcinonensis, Xaverium Barcinonensem et Vincentium Emporitanum.

Avitus cum sibi proxime sedentibus erraticum colloquium instituit. Cum Georgio, linguae Latinae magistro, agit de seminariis Latinis Matritensibus. Cum Quirino multa commemorat de mansione sua Romae, et de optimo linguae Latinae fautore, Foster Reginaldo, multum colloquntur. Cum Albino, quocum plurimum speraverat colloqui, tam multis interlocutoribus pauca tractat de Circulis Latinis: de rebus technicis et de eis CC LL quibus non est situs electronicus ...

Xavierus interea Barbastrensis cum Vincentio et Ivano, proxime sedentibus, de variis linguis earumque vigore colloquuntur, inter quas de Gaelica (in Hibernia Meridionali) semiextincta quamquam plenam habeat officialitatem magnumque mythologiae Celticae nomen, et de "nostratico" theoriisque secundum quas omnes linguae e paucissimis familiis originem ducunt, necnon de libro 'Lenguas del mundo' a doctrice Junyent Carme, magnae muliere cordialitatis, scripto. Profecto Vincentio, de bilinguismo in Catalonia pergunt loqui: Ivanus enim solam officialem in Catalonia linguam Catalonicam postulabat, at Xavierus coofficialitatem cum Castellana defendebat (de qua re pluries in Grege Latine Loquentium facta est controversia).

Hora denique septima, post duas brevissimas amoenissimasque horas inter tam jucundos vivae Latinitatis cultores peractas, Xavierus proficisci debet, quem Avito oportet comitare. Sessio dissolvitur.